மெட்டாஸ்டேடிக் புரோஸ்டேட் புற்றுநோய் (Metastatic Prostate cancer) என்றால் என்ன?
சில நேரங்களில், புற்றுநோய் செல்கள் புரோஸ்டேட்டில் இருந்து தப்பித்து விரைவாக வளர்ந்து, அருகிலுள்ள திசுக்களுக்கு பரவுகிறது அல்லது "மெட்டாஸ்டாசிசிங்-metastasizing" ஆகும். அருகிலுள்ள நிணநீர் முனைகள் (Lymph nodes) பெரும்பாலும் புற்றுநோய் பரவக்கூடிய முதல் இடமாகும். புரோஸ்டேட் புற்றுநோயானது கண்டறியப்படும்போது உங்கள் நிணநீர் முனைகளுக்கு பரவியிருந்தால், அது உடலின் மற்ற பகுதிகளுக்கும் பரவுவதற்கான அதிக வாய்ப்பு உள்ளது என்று அர்த்தம்.
புரோஸ்டேட் புற்றுநோய் செல்கள் இரத்த ஓட்டத்தில் கலந்தால், அவை உடல் முழுவதும் பல்வேறு தளங்களில், பொதுவாக எலும்புகளில், மேலும் அரிதாக கல்லீரல், நுரையீரல் அல்லது மூளை போன்ற பிற உறுப்புகளில் தங்கி மேலும் வளர்ந்து மெட்டாஸ்டெட்டிக் புற்று நோயாக உருவெடுக்கும். 85% முதல் 90% மெட்டாஸ்டேடிக் நிகழ்வுகளில் எலும்பு மெட்டாஸ்டேஸ்கள்(bone metastasis) காணப்படுகின்றன.
புற்றுநோய் உடலின் எந்தப் பகுதிக்கு பரவி இருந்தாலும், அது தொடங்கிய திசுக்களின் வகையால் எப்போதும் அடையாளம் காணப்படுகிறது. புரோஸ்டேட் புற்றுநோய் மற்ற உறுப்புகளுக்கு மாறலாம், ஆனால் இது எப்போதும் புரோஸ்டேட் புற்று நோய்க்கான தன்மைகளை உள்ளடக்கி இருக்கும், ஏனெனில் இது பிறழ்ந்த புரோஸ்டேட் செல்களைக் கொண்டுள்ளது.
மெட்டாஸ்டேடிக் புரோஸ்டேட் புற்றுநோயால் கண்டறியப்பட்ட ஆண்கள் (அதாவது, நோயறிதலின் போது அவர்களின் நோய் ஏற்கனவே புரோஸ்டேட்டைத் தாண்டி வேறு உறுப்புகளுக்கு பரவி இருந்தால்), பெரும்பாலும் அறுவை சிகிச்சை அல்லது கதிர்வீச்சு போன்ற முதன்மை புரோஸ்டேட் கட்டிக்கு மட்டுமான சிகிச்சைகளுக்கு உட்படுத்தப்படுவதில்லை. அதற்கு பதிலாக, அவர்களின் சிகிச்சை பயணம் ஹார்மோன் சிகிச்சையுடன் தொடங்கலாம், அங்கிருந்து, முந்தைய கட்டத்தில் கண்டறியப்பட்ட மற்றும் அடுத்தடுத்த நோய் முன்னேற்றம் கொண்ட ஆண்களைப் போன்ற பாதையைப் பின்பற்றலாம்.
